Cebuano Ug Ako

Pinadayag nga Pagbati


Daghan nang mga adlaw ug mga gabii
Gisaupan sa mga tanghaga ang akong gibati
Alimpatakan ko gibuyok sa mga pangutana
Sa malamatong saloma sa atong panaghigala

Di ko matuki kung unsa o ngano man
Nga naghasol kini sa akong panumduman
Gikutaw sa tumang kalibog ang akong salabutan
Sa hugot nga pagkabugkos niining maong suliran

Gisuwayan ko sa pagsusi ang akong kaugalingon
Aron akong matino ang angayang buhaton
Giugkat ug gianinaw ang tanang mga kahigayunan
Hangtud nga mituyhakaw ra gyud ang tinuod nga hinungdan

Nunot sa daghang mga gumonhap sa kinabuhi
Hadiin kita nagkaalayun ug nagkasumpaki
Nasuta ko sa akong kaugalingon ang tumang kamatuoran

Nga labaw pa diay sa higala ang pagtan-aw
ko kanimo sukad pa man